張敬軒演唱會｜盤點5大超感動時刻 王菀之、鄧麗欣 還有一首90後集體回憶！
《The Next 20 張敬軒演唱會》終於在昨天（30日）來到最後一場個唱補場，演唱會場場精彩，而且嘉賓每位都充滿亮點，《有線生活》整理了網民盤點的5大超感動時刻，除了王菀之、鄧麗欣外，還有誰可以感動觀眾？即去下文看看吧！
【1】王菀之：下世會去搵返你！
張敬軒尾場首位登場的嘉賓是王菀之（Ivana），軒仔形容Ivana是出生入死，亦是「靈魂相認朋友」，並大爆當年因與主辦方溝通出現問題，而「同Ivana被困喺一個場館，我哋當時諗應該走唔到，好彩當時有個恩人喺香港飛嚟救我哋，我咁大個仔都未見過咁大把牛肉刀，所以今晚呢個舞台唔可以冇佢出現。請大家以熱烈掌聲歡迎我嘅皇后！」
後來Ivana向軒仔讀出一封信：「張敬軒，你過得好嗎？喺冇見面嘅日子，我同你同好多人一樣都追尋自己嘅夢想，有時好困難，但冇諗過會放棄，因為放棄咗就會成定局……」此時軒仔已經眼濕濕，Ivana隨即叫停軒仔，再讀：「因為放棄咗就會成定局，但唔放棄一路行落去仲有希望，所以我哋彼此都要繼續努力。無論將來係點，我都祝福你未來有更多個20年，做你夢想做嘅事，生活開心自在。幾年前，你喺同一個地方問我『如果下一世遇唔返我點算呢？』我怕你唔記得，依家再答你一次，我會去搵返你！」
兩人讀完後相擁而泣，向現場觀眾大灑洋蔥，軒仔向Ivana道謝：「多謝皇后！多謝你！」，然後二人手拖手唱出《高八度》。
【2】鄧麗欣：10年前錯過對方
軒仔第13場演唱會找來了10年前曾合作拍攝《十分愛》的鄧麗欣（Stephy）做嘉賓。軒仔重提當年追求Stephy的戲份，笑說當時自己「又乾又瘦，好似冇運行」，又拿Stephy與方力申的過氣情史開玩笑，說「我睇唔到你有愛嘅眼神，因為你當時望慣另一個靚仔嘛。」，Stephy亦自嘲當年演技麻麻，並說：「你咁有才華嘅靚仔，我喺戲裏面點解唔係揀你，揀咗阿力（方力申角色）㗎？」軒仔回應：「戲外十幾年後，你揀番我咪得囉！」
後來兩人一起拖手合作電影主題曲《十分愛》，然後Stephy再獻唱經典《他不准我哭》。這兩首歌分別是在2007年和2009年發行，當年電影票房大賣$1,200萬，加上Stephy與方力申的10年情，絕對是90後的童年回憶，令不少網民大叫「事隔多年再聽好感動！」
【3】雪花抄：90後集體回憶
《雪花抄》是經典網絡遊戲「跑online」的主題曲之一（編按：另一首正是Stephy的《Fantasy Tale》），相信當年不少90後一放學便會立即回家開「跑」，與朋友對戰。而軒仔早前亦表示除了當年錄完音外，直至兩年前《張敬軒╳香港中樂團盛樂演唱會》才首次向公眾獻唱《雪花抄》。
時至今日，軒仔終於再度開腔大唱《雪花抄》，音樂一起已勾起現場觀眾和一眾網民的集體回憶，中段更全場一起大合唱，掀起高潮，令不少人高呼是時代的眼淚！
【4】C AllStar：期間限定地球保衛隊
軒仔早前在叱咤樂壇流行榜頒獎典禮中，獲得至尊唱片大獎，而今次邀請C AllStar到演唱會做嘉賓時，大讚「《人類世》應該係今年至尊大碟，我覺得成張唱片，整個概念又完美又能貫穿你C AllStar精神。」令四子感動萬分，不少觀眾都大讚軒仔識英雄重英雄。
後來軒仔又大爆自己當時在廣州被唱片公司欺騙，令他失去成為樂隊組合的機會，現在終於可以與C AllStar集合，組成期間限定的地球保衛隊。隨即，軒仔與C AllStar合唱《集合吧！地球保衛隊 》後，四子又獻唱了《留下來的人》，送給觀眾作結，歌詞講述身邊不少人都移民離自己而去，令全場超感動。
【5】陳蕾：相信一切是最好的安排
陳蕾與軒仔一樣都是來自廣州，陳蕾表示中學時期得知廣州出了一名歌手叫張敬軒時，身邊同學都覺得好驕傲好光榮，如今，她與軒仔都選擇來到香港作為音樂基地，感受樂迷對自己一直以來的支持，感性地說「今日能夠企喺呢個舞台同我嘅同鄉相遇，一齊合唱，我只能夠用十隻字總結：《相信一切是最好的安排》。」
隨後，陳蕾獻唱了歌曲《相信一切是最好的安排》，內容講述自己當初在廣州打拼的時刻，鼓勵大家「當你做好自己，有充足準備之後，上天就會安排好一個機會你發揮。」
張敬軒演唱會早前因為疫情關係暫定，到現在終於順利來到尾聲，雖然軒仔一直自嘲自己是「樂壇關愛座」，但相信入場的每位觀眾都感受到軒仔的實力，和他對廣東歌樂壇的堅持。
推薦閱讀：
盧瀚霆Anson Lo剖白入行三年辛酸 MIRROR成軍後常受謠言攻擊 終強大內心正面回應大眾
盤點MIRROR ERROR最新感情狀況 除Frankie外還有哪位成員回復單身？
😊 為生活增值 Like 👉有線生活FB
💪 睇健康貼士 Like 👉有線健康FB
🔔 接收最新生活資訊 follow 👉 有線生活IG @icable.life
